|
Hein Hoop un Henning Venske sünt Nabers in Eiderstedt, Nordfreesland. Hein Hoop is van Huus ut Holtbildhauer, het aber ook al en Bült Boken schreben. Henning Venske kennen vööl van uns Lesers seker vör allen Dingen wegen sien Wark bi 't Radio un bi 't Fernsehen. Dit Book hebben se tosamen rutgeben un ook sülst de Biller darto maalt. De Grimmige Märchen sünt deels up Hochdüütsch, deels up Plattdüütsch schreben. Venske het de hochdüütsche, Hoop de plattdüütsche Märchen schreben. Enigen van de Geschichten sünt drullige Navertellsels van Märchen, de wi as Kinner heel anners kennenlernt hebben. Hoop un Venske hebben de Grimmige Märchen eerder för grote Lü as för Kinner schreben. Gode Raat is düer (S.11) is de Geschicht van en jungen König, de Gluupogen het un darum en Raadgever na de anner um Hülp froggt. He kriggt woll immer en goden Raadschlag, aber na elke Kur het he en neeien Gebreck. Nadat sien Gluupogen verschwunnen sünt, kriggt he en dicken Hals, na de dicke Hals Gnubbels an 't Mors un so geiht dat wieder, bit he na 't Platthauen van sien Tönen, de so dick worden weern as Tuffels, neet bloot Pannkookfoten het, man as Togaav ook noch sien olle Gluupogen weer torügg: 'Wegen sien Glupschogen un wegen sien Pannkokenfööt is de junge Regent as "Froschkönig" in de hochdütsche Märkengeschicht ingahn.' , vertellt uns de Schriever an 't Enn van 't Vertellsel. Blondi un de Steerndalers (S.22) hannelt van 'n jungen rieken Meid, de sück vörnohmen het, noch rieker to worden. Se will nett as Steerndaler all hör Kleer an arme Lü geben. Darför fahrt se na de Bermudas. Man as se denn ennelk heel nakend an de Strand steiht un de Steerns van de Himmel fallen, het se keen Büdel darbi, um de uptosammeln. En Straaf "wegen Erregung öffentlichen Ärgernisses" kriggt se noch up de Koop to. So as in disse twee Märchen geiht 't in de anner Märchen ook to. 'N Hoop to smüüstern het man seker. (IR) <dt.>
|
